Brunná tók vel á móti fyrstu veiðimönnum vorsins þar. 13 bleikjur og 2 birtingar á þremur tímum er ekki amalegt. Einn af aðdáendum Brunnár sendi okkur pistil og myndir frá fyrstu veiðiferð vorsins. Þess má geta að eitthvað er til að lausum dögum í Brunná á næstunni.
”Þar sem við fjölskyldan vorum á skíðum á Akureyri helgina fyrir Páska, urðum við að nýta okkur tækifærið og skreppa stutta ferð í Öxarfjörðin og opna veiðina í Brunná.
Veðrið lék við okkur þennan stutta tíma sem við stoppuðum við, logn og léttskýjað. Mikill snjór var á svæðinu og verða án efa miklar leysingar þegar líður tekur á vorið.
Þar sem ætlum ekki að eyða löngum tíma við veiðar, fannst okkur vænlegast að veiða í vatnamótum Brunnár og Sandár. Það sem kom mér verulega á óvart, var hversu Sandáin var tær og vatnslítil og ótrúlega veiðileg.
Daníel Oddsson 11ára og Katrín Sóley Oddsdóttir 9ára voru mér til halds og traust, og eru bæði framtíðar veiðimenn.
Í stuttu máli veiddum við 13 bleikjur og 2 sjóbirtinga, hann Daniel veiddi óstuddur sinn fyrsta flugufisk (sjá viðhangandi mynd), sem var 8punda sjóbirtingur (sá stærsti í ferðinni), bjartur og fallegur fiskur. Hið merkilega var að fiskurinn tók aðeins 4m frá bakka og var viðureignin var mjög hörð og á tímum tvísýnt hver hafði betur, en að lokum var það hinn ungi veiðimaður sem kláraði dæmið afar stoltur. Annars var bleikjan ca 2-4pund og mjög vel haldnar og fallegar.
Allir fiskarnir voru teknir á alls óþekkta flugu sem heitir ”Flæðamúsin” hehe !
Meiriháttar ”stuttur” veiðitúr hjá okkur í þetta sinn, en mikil tilhlökkun að veiða aftur í Brunná í sumar. ”
