Fréttir

18 mar. 2008

Hofsá í Vesturdal

Eftir miklar bollalengingar komst stjórn SVAK að þeirri niðurstöðu að leyfa aðeins fluguveiði í Hofsá í Vesturdal, ekki síst vegna ráðlegginga Bjarna Jónssyni deildarstjóra Norðurlandsdeildar Veiðimálastofnunnar en hann hvatti stjórn til þess að hlífa hrygningarfiski. Verður tekin upp sú stefna í sumar að skylt verður að sleppa öllum silungi yfir 45 sm, samkvæmt hans tilmælum. Kvóti verður 3 silungar á dagstöngina og að auki verður leyft að hirða einn lax á stöng. Þetta var einnig ákveðið í samráði við Bjarna og er í samræmi við stefnu stjórnar að láta fiskifræðina stýra álagi á veiðiár félagsins. Eftir 31. ágúst verður eingöngu veitt og sleppt fram til 20. september en þá verður öllum veiðum hætt.

Séð upp að Hofsjökli og að Orravatnsrústum.

Þessar ákvarðanir eru ekki síst teknar vegna þess að lítið er vitað um veiðiálag síðustu ára, skráningar eru litlar og svæðið er í raun svolítið spurningarmerki. Er félagið í samvinnu við fiskifræðing um seiðamælingar næsta sumar og merkingar. Þótti stjórn mikilvægt að fara varlega í sakirnar í sumar þar sem víða í kringum okkur eru bleikjustofnar í mikilli niðursveiflu og leyfa náttúrunni að njóta vafans. En sagnir eru mikla bleikjuveiði fyrrum í Hofsá og samkvæmt áliti fiskifræðinga er þetta ein merkilegsta bleikjuá á norðurlandi.. Er því mikil eftirvænting meðal félagsmanna með Hofsá og er það eindreginn vilji stjórnar að ganga vel um þessa perlu fyrir vestan.
Er öllu verðlagi stillt í hóf og er mikið pláss fyrir veiðimenn, eru fáar ár sem bjóða uppá 8-9 km á hverja stöng! Aðstaða er góð fyrir veiðimenn , notalegt hús og nokkuð gott aðgengi að ánni víða. En einnig eru svæði sem ættu að höfða til veiðimanna sem vilja ganga mikið og hafa vel fyrir hlutunum. Efri hluti svæðisins er hreinn ævintýraheimur og verður spennandi að kanna það.

Fossá í Vesturdal


En stjórn ákvað að leyfa kastsangir með flugu, er það hugsað fyrir þá veiðimenn sem ekki hafa náð fullum tökum á fluguveiði og kannski ekki síst fyrir veiðimenn af yngstu kynslóðinni. Mjög auðvelt er að veiða með flotholt og flugu og er það í raun mun einfaldara enn að veiða með maðk. En það eru nokkur atriði sem þarf að hafa í huga og verður fjallað um það sérstaklega. Verður þá farið í gegnum hvernig best er að útbúa tauma, hvaða flugur henti vel og fleira. Þetta er ekki síst vegna fjöldskyldustefnu félagsins og þá stefnu stjórnar að gera veiði á svæðum SVAK aðgengilega fyrir sem flesta félagsmenn.
Þótti ekki rétt að nota önnur veiðarfæri en flugu þar sem skylda er að sleppa öllum stærri fiski með framtíð bleikjustofnsins í huga og meðan við erum að kortleggja veiðiþol árinnar. Heilbrigður og sterkur stofn þolir mikið veiðiálag en á meðan svo litlar upplýsingar eru um ánna voru þetta niðurstöður stjórnar.

Hofsá við Gil.

Bjarni Jónsson deildarstjóri Norðurlandsdeildar Veiðimálastofnunar verður svo með merkilegan fyrirlestur þann 17. apríl sem hefur yfirskriftina “Fiskifræði veiðimannsins.” Mun hann fjalla um vatnalíffræði, vatnalífverur, fæðu og tímgun laxfiska, stofnstærðir, veiðilálag og mun hann tvinna þetta saman við umfjöllun um bæði Hofsá í Vesturdal og Ólafsfjarðará.  Er þetta hvalreki fyrir veiðimenn þegar við stöndum frammi fyrir síauknu álagi á veiðiár, veiðimönnum fjölgar stöðugt og tækni þeirra eykst að auki. Ábyrgð veiðimanna er mikil og er nauðsynlegt að vera meðvitaður um þessa hluti.


ÞB

Til baka

Veiðileyfi

Hörgá
Ekkert laust eins og er.

Laxá - Hraun
Ekkert laust eins og er.

Ólafsfjarðará
Ekkert laust eins og er.

Svarfaðardalsá
Ekkert laust eins og er.