Fréttasafn

Fréttir Svak frá stofnun félagsins



30 des. 2004
Allir sem vettlingi geta valdið eru hvattir til að leggja hönd á plóginn kl. 17.00 í dag þegar við flytjum félagsheimilið okkar úr Gróðrastöðinni niður á Oddeyrartanga. Því miður misstum við leigusamninginn um aðstöðu í Gróðrastöðinni frá og með áramótum en teljum okkur hafa fundið álíka gott eða jafnvel betra húsnæði á Oddeyrinni. Þeir félagsmenn sem sjá sér fært að leggja okkur lið við flutningana eru hvattir til að mæta í Gróðrastöðina kl. 17.00 í dag. - Stjórnin

01 nóv. 2004

Félagsmenn eru minntir á að fyrsta hnýtingakvöld vetrarins er þriðjudagskvöldið 2. nóvember kl. 20-22. Skorað er á karla og konur að dusta rykið af þvingunni, fjöðrunum og öllu öðru sem til þarf. Hittumst hress og kát í Gróðrastöðinni, segjum sögur frá liðnu sumri og hnýtum flugurnar sem hann tók og kemur til með að taka!

 


25 okt. 2004
Stjórn félagsins ákvað á fundi í síðustu viku að vetrarstarfið hefjist formlega þriðjudagskvöldið 2. nóvember kl. 20 með hnýtingakvöldi í Gróðrastöðinni. Einnig var samþykkt að hafa aðeins opið einu sinni í viku fram að áramótum, þ.e.a.s. á þriðjudagskvöldum, en bæði á þriðjudags- og fimmtudagskvöldum eftir áramótin þegar boðið verður upp á a.m.k. eitt kynningar- eða fræðslukvöld í mánuði. Á stjórnarfundinum var rætt ítarlega um starfið síðasta árið og gerðar tillögur um breytingar og úrbætur þar sem þurfa þykir. Félagsmenn eru hvattir til að mæta með þvinguna þriðjudagskvöldið 2. nóvember í félagsheimilið!

22 júl. 2004

Undanfarna daga hefur verið frábær veiði á veiðisvæði 3. í Blöndu og hafa þeir félagar Svak sem verið hafa að veiða verið hæstánægðir með sinn hlut. Veiðin hefur verið 5-15 laxar á dag á stangirnar tvær undanfarið. Veiðimenn er voru núna fyrr í vikunni fengu 1 lax á fyrstu vakt og svo 15 á næstu tveim vöktum og enduðu því með 16 laxa í allt, ásamt því að sett var í  10-15 laxa til viðbótar. Fyrr hafði veiðimaður verið einn dag í fjölskylduveiði og komu 7 laxar á land og einnig kom 7 punda urriði. Hollið þar á undan var með 10 laxa á einum og hálfum degi, og eitt holl 8 laxa á einum degi. Því er ekki hægt að segja annað en að svæðið hafi fallið vel í kramið hjá Svak félögum.

Mynd: Lax þreyttur í neðsta veiðistað í Blöndu III


08 júl. 2004

Útgáfukynning verður haldin í Pennanum-Bókval á Akureyri laugardaginn 10. júlí kl. 13 og eru allir stangaveiðimenn að sjálfsögðu hjartanlega velkomnir.

Þriðja bindi Stangaveiðihandbókarinnar er komið út og verður bókinni dreift í verslanir á næstu dögum. Í bókinni er fjallað um hátt í 400 veiðiár og -vötn í Húnavatnssýslum, Skagafjarðarsýslu, Eyjafjarðarsýslu og Suður-Þingeyjarsýslu eða á svæðinu frá Hrútafirði og austur um að Jökulsá á Fjöllum.

Í Stangaveiðihandbókunum er fjallað um einstök veiðisvæði, sagt frá því hverjir fara með veiðiréttinn og hverjir selja veiðileyfin. Greint er frá verði veiðileyfa á einstökum vatnasvæðum og þróun veiðanna í áranna rás. Sagðar eru veiðisögur og rætt er við veiðimenn og veiðiréttareigendur.

Stangaveiðihandbækurnar eru handhæg uppflettirit sem ætluð eru til að hjálpa fólki til að fá sem mest út úr frítíma sínum. Bækurnar nýtast jafnt byrjendum sem þaulvönum stangaveiðimönnum. Í þeim er fjöldi litmynda af veiðisvæðum og kort sem sýna staðsetningu þeirra.

Höfundur Stangaveiðihandbókanna er Eiríkur St. Eiríksson sem er að góðu kunnur fyrir ritstörf sín um stangaveiðar en hann hefur m.a. ritstýrt veiðitímaritunum Á veiðum og Veiðimanninum. Hann er einnig ritstjóri Skipa.is, sjávarútvegsvefs Fiskifrétta. Útgefandi Stangaveiðihandbókarinnar III er nýstofnað útgáfufélag, ESE – Útgáfa & fréttaþjónusta.


01 júl. 2004

Laxinn er mættur í Blöndu III og hafa sést laxar á víð og dreif um svæðið og nokkrir þeirra í stærri kantinum. Veiðin á svæði 1 er nú að ná hámarki og var tveggja daga holl fyrr í vikunni með 50 laxa á 4 stangir ! Þann 6. júlí fréttum við svo af mönnum sem höfðu fengið 5 laxa á einum og hálfum degi og orðið varir við töluvert meira af laxi.
Við eigum ennþá eftir nokkur veiðileyfi í Blöndu III á besta tíma - og á góðu verði.

12.júlí – 2 stangir
13.júlí – 2 stangir
14.júlí – 2 stangir
16.júlí – 1 stöng fh.
24.júlí – 2 stangir eh.
28.júlí – 2 stangir 

Verð 11.570.- kr. á stöng á dag.
Nánari upplýsingar á svak@svak.is og í síma 893-1713


28 jún. 2004

Félögum í Stangaveiðifélagi Akureyrar býst 10% afsláttur af veiðileyfum í Grafará við Hofsós sem er falleg 2ja stanga sjóbleikjuá. Áin er um 11 km löng og því er nóg pláss fyrir menn. Áin hefur verið að gefa á bilinu 2-500 bleikjur á sumri og hefur veiðiálag ekki verið mikið. Nú verður veiðitími frá 1. júlí til 15. september. Verð er frá 4.900-6.900 kr. á stöng dagurinn og er með gistingu á Bæ í um 4 km fjarlægð frá ánni. Þar er ágætis aðstaða, allt til alls og sérinngangur fyrir veiðimenn.

Nánari upplýsingar er að finna á www.veidimenn.is.

Áhugasamir hafi samband við Jakob Hrafnsson, netfang hans er veidimenn@veidimenn.is.


24 jún. 2004

Loksins loksins! Félagsskírteinin eiga nú að hafa borist öllum skuldlausum félagsmönnum eða ættu í síðasta lagi að gera það á morgun.

 

Munið að þau gilda sem afsláttarkort hjá Sjóbúðinni á Akureyri og hjá Útivist & veiði í Reykjavík. Síðast en ekki síst gilda þau sem sumarkort í Ljósavatn.

 

Ennþá eiga þónokkrir félagsmenn eftir að greiða árgjald fyrir árið 2004 og nokkrir fyrir 2003 líka. Stjórn SVAK skorar á menn að fylkja liði um þetta unga félag og gera upp árgjöldin. Það er mikilvægt að við stöndum saman að einu stóru og sterku félagi sem getur staðið fyrir virku félagsstarfi og vonandi haslað sér einhvern völl á veiðileyfamarkaðinum í nánustu framtíð.

 

Með sumarveiðikveðju!

Stjórn SVAK


20 maí 2004

Stangaveiðifélag Akureyrar blæs til vorfagnaðar næsta laugardag, 22. maí, frá kl. 14-16 við félagsheimili sitt í gömlu Gróðrastöðinni við Krókeyri. Boðið verður upp á líflega og fjörmikla dagskrá um leið og sleginn verður botninn í vetrarstarf félagsins.

Meðal dagskráratriða eru:

  • Haraldur Ólafsson, sem hlotið hefur margvísleg verðlaun fyrir uppstoppaða fugla og fiska, verður á staðnum og sýnir gripi sína
  • Keppt verður í fluguköstum og verða veitt verðlaun frá Sjóbúðinni fyrir lengsta kastið
  • Gestum og gangandi verður boðið upp á grillaðar pylsur og gos í boði Norðlenska og Vífilfells
  • Ný veiðivöruverslun á Akureyri kynnir vörur sínar
  • Fræðslunefnd Stangaveiðifélagsins veitir tilsögn í fluguköstum og öðru sem snýr að stangaveiði
  • Kunnir hnýtarar sýna ofan í fluguboxin sín
  • Happadrætti þar sem í verðlaun er veiðidagur í góðri á

Skorað er á félagsmenn að fjölmenna með fjölskyldum og vinum.


14 maí 2004

Ákveðið hefur verið að fara aðra hópferð að Ljósavatni á sunnudaginn kemur. Ferðin sem farin var síðast tókst með afbrigðum vel og veiddu allir eitthvað, sumir þó miklu miklu meira en aðrir, og var jafnvel talað um mok. Veiðin er best í vatninu á vorin og snemmsumars og því er um að gera að nýta sér árskortið sem best. Lagt verður upp frá félagsheimilinu okkar í Gróðrastöðinni við Krókeyri kl. 14.00 á sunnudaginn, 16. maí, og eru félagsmenn hvattir til að fjölmenna. Þannig fá þeir góða leiðsögn um vatnið hjá þeim sem þekkja þar til. Þið sem hafið sótt félagsskírteinin ykkar; munið að hafa þau meðferðis.

Þess ber að geta að í gærkvöldi flutti Bjarni Jónsson, forstöðumaður Norðurlandsdeildar Veiðimálastofnunar, afar gott og fróðlegt erindi um sjóbleikjuna og bleikjurannsóknir í félagsheimilinu. Kom þar margt forvitnilegt í ljós, til dæmis að um það eru dæmi ofarlega í vatnakerfum að bleikjuhængar nenni ekki að ganga til sjávar og láti bara hrygnurnar um það ferðalag. Þær verði þá enda mun stærri og hraustlegri, en það dugi að hafa "karlana" í minni kantinum.


13 maí 2004

Bjarni Jónsson, forstöðumaður Norðurlandsdeildar Veiðimálastofnunar, verður gestur okkar íkvöld og ætlar að fjalla um fjölbreytileika bleikju á Íslandi og lífshætti sjóbleikjunnar. Fjallað verður um fjölbreytilegar aðlaganir bleikjunnar að ólíkum búsvæðum og þætti sem ráða útbreiðslu og sveiflum í stofnstærð sjóbleikjustofna. Bleikjan er sú tegund íslenskra ferskvatnsfiska sem getur nýtt sér fjölbreyttustu búsvæðin en þó ræðst útbreiðsla og stofnstærð sjóbleikju í íslenskum ám ekki síst af árferði og samkeppni við aðrar fisktegundir eins og lax og urriða. Ennfremur mótast útlit og lífshættir einstakra stofna af margvíslegum umhverfisþáttum. Í fyrirlestrinum verður fjallað um þróun þessa fjölbreytileika, orsakir hans og hvaða þýðingu hann hefur fyrir verndun og nýtingu sjóbleikju á Íslandi.

Búast má við stórfróðlegu erindi hjá Bjarna og er skorað á áhugasama veiðimenn að fjölmenna. Allir velkomnir! Enginn aðgangseyrir.


07 maí 2004
Félagsskírteini SVAK fyrir árið 2004 eru nú komin úr prentun og plöstun frá Halli í Stell. Gíróseðlarnir voru sendir út í síðustu viku og geta þeir sem hafa greitt árgjaldið sótt skírteini sín í félagsheimilið næstu þriðjudags- og fimmtudagskvöld. Skorað er á félaga að koma og skoða okkar ágæta félagsheimili í Gróðrastöðinni við Krókeyri og sækja skírteinið sitt í leiðinni. Það nýtist sem afsláttarkort í Sjóbúðinni og einnig hjá Útivist & veiði í Reykjavík, en síðast en ekki síst gildir það sem sumarkort í Ljósavatn. Félagi okkar sem var á ferðinni við vatnið í morgun, leit yfir spegilsléttan vatnsflötinn og sá fiska vaka vítt og breitt!

06 maí 2004
Í kvöld kl. 20 verður Þröstur Elliðason með kynningu á veiðisvæðum í félagsheimili Stangaveiðifélags Akureyrar í Gróðrastöðinni við Krókeyri. Þröstur Elliðason er þekktur í heimi veiðimanna og átti meðal annars stóran þátt í ævintýrinu í kringum uppbyggingu laxveiða í Rangánum á sínum tíma. Hann leigir nú og ræktar laxveiðiár víðsvegar um landið og má þar nefna Hrútafjarðará og Breiðdalsá, auk þess sem hann hefur byggt upp mikla og góða urriðaveiði í Minnivallalæk. Þröstur ætlar að sýna frá veiðislóðum hringinn í kringum landið, fjalla um veiðistaði, bráðina og þær aðferðir sem gefast best. Félagar fjölmennum! Aðgangur að sjálfsögðu ókeypis.

28 apr. 2004

Forsprakkar fræðslunefndar, félagarnir Rúnar Þór Björnsson og Guðmundur Ármann Sigurjónsson, ætla að standa fyrir kastæfingu kl. 19.30 á fimmtudagskvöld á flötinni fyrir framan Gróðrastöðina. Kjörið er fyrir byrjendur í fluguköstum að mæta í blíðunni og fá nokkra tilsögn hjá lengra komnum. Ætlunin er að hafa það síðan huggulegt í félagsheimilinu á eftir, skoða saman myndbönd og drekka kaffi. Húsið er opið öll þriðjudags- og fimmtudagskvöld og ætlar fræðslunefndin að halda áfram með kastæfingarnar þau kvöld ef vel tekst til.

Þeir standa einnig fyrir hópferð að Ljósavatni laugardaginn 1. maí. Lagt verður upp frá Gróðrastöðinni kl. 16.30 og geta menn þá sameinast um bíla til að spara eldsneytið og malbikið. Skorað er á félagsmenn að fjölmenna í hópferð að Ljósavatni og fá nokkra tilsögn hjá þeim sem þekkja nokkra helstu veiðistaðina þar.


25 apr. 2004

Stjórn Stangaveiðifélags Reykjavíkur hefur ákveðið að bjóða félagsmönnum í SVAK veiðileyfi á sama verði og félagsmenn þess njóta. Tilboðið gildir til 15. maí en verður framlengt ef þurfa þykir. Það er margt forvitnilegt í boði hjá SVFR og ekki ónýtt að njóta þessarar velvildar hjá því ágæta félagi. SVFR er til að mynda með á leigu Svartá hér í næsta nágrenni við okkur en einnig mætti varpa fram þeirri hugmynd að félagsmenn í SVAK fari í veiðiferð til höfuðborgarinnar og reyni fyrir sér í Elliðaánum eða Korpu. Skoðið úrvalið á heimasíðu Stangaveiðifélags Reykjavíkur, www.svfr.is, og hafið samband við skrifstofu þess til að ganga frá kaupum á leyfum á félagaverði.


25 apr. 2004
Nokkrir félagar úr SVAK fóru ásamt börnum sínum að Arnarnesvatni seinnipart sumardagsins fyrsta og renndu fyrir bleikju í blíðskaparveðri. Vart var við talsvert af fiski víða um vatnið en ekki náðist nema einn ætilegur í þetta sinn og var það Björn Heiðar sem krækti í hann á spinner. Rúnar Þór landaði tveimur sem var sleppt. Guðmundur Ármann varð var við talsvert af fiski norður með malarkambinum og suma væna að sögn, en þeir eltu bara og vildu ekki meira. Elín misti vænan fisk ásamt krók og línu en aðrir urðu lítið varir. Það er hugur í nokkrum félagsmönnum að óska eftir því við stjórn að gera nýjan leigusamning fyrir þetta ár þar sem á síðasta ári vorum við allt of seinir í gang og misstum af besta tímanum í Arnarnesvatni eða Arnarnestjörn eins og einn kunnugur sagði að væri rétt heiti á þessu vatni. Fallegt er við vatnið, mikið og skemmtilegt fuglalíf, talsvert er af fiski fyrst á sumrin, stutt að keyra úr bænum og það eina sem þarf er að læra á vatnið. 

Með sumarkveðju frá fræðslunefnd; Rúnar Þór og Guðmundur Ármann

21 apr. 2004

Ákveðið hefur verið að fara í hópferð til veiða í Arnarnesvatni á morgun, sumardaginn fyrsta. Lagt verður upp frá félagsheimilinu okkar, Gróðrastöðinni við Krókeyri, klukkan 16.30 og fara menn á sínum einkabílum en ættu að geta samnýtt þá eitthvað. Skorað er á áhugasama að gera sér dagamun á sumardaginn fyrsta með þessum hætti. Sem kunnugt er vorum við með sumarkort fyrir félagsmenn í vatninu síðasta sumar en svo virðist sem afar fáir félagsmenn hafi nýtt sér það. Ekki hefur verið gengið frá samningum um veiði í vatninu næsta sumar en hópferðin á morgun er kjörið tækifæri fyrir félagsmenn til að kynna sér þennan kost. Fararstjóri verður Rúnar Þór Björnsson.


21 apr. 2004

Góður andi ríkti í félagsheimilinu í gærkvöldi og var Jón Bragi í essinu sínu þegar hann sýndi áhugasömum hnýturum hver galdurinn er við að hnýta Muddler Minnow. Um 10 manns sátu við þvingurnar og hafa menn orð á því að fleiri mættu gjarnan sýna sig í Gróðrastöðinni. Fréttir af félaginu eru þær helstar að félagsskírteinin verða tilbúin fyrir mánaðamót, Bjarni Jónsson frá Hólum ætlar að fræða okkur um bleikjuna á næstunni en dagsetning hefur ekki verið ákveðin, Þröstur Elliðason kemur til okkar 6. maí með myndasýningu og eins og áður hefur komið fram, þá hefur nú verið gengið frá skriflegum samningi okkar um veiði félagsmanna í Ljósavatni næsta sumar. Við bendum félagsmönnum á að láta frá sér heyra - munið spjallborðið hér til vinstri.


16 apr. 2004
Pétur Brynjólfsson og Sigmundur Ófeigsson voru með veiðistaðalýsingu á Fnjóská hjá Stangaveiðifélagi Akureyrar í gærkvöldi. Var gerður afar góður rómur að lýsingu þeirra þegar þeir þokuðu sér upp frá ósum árinnar alla leið fram að Illugastöðum og sögðu frá hverjum einasta tökustað og bleikjupolli á þeirri löngu leið. Fremur fámennt var í félagsheimili SVAK og töldu menn að skýringin væri helst sú að KA-menn voru að keppa í handboltanum. En þeir sem mættu til að hlusta á Pétur og Simma í Gróðrastöðinni við Krókeyri veiða örugglega miklu betur en flestir aðrir í Fnjóská næsta sumar. Það var gaman að hlusta á Pétur og Sigmund segja frá og kunna félagsmenn þeim bestu þakkir fyrir.

16 apr. 2004

Formaður og gjaldkeri félagsins gengu á fund bænda við Ljósavatn síðdegis í gær og lögðu fyrir þá samning um veiðar í vatninu næsta sumar. Skemmst er frá því að segja að erindinu var mjög vel tekið og að Arnstapa var skrifað undir samkomulag um að félagsmenn SVAK veiði án endurgjalds í Ljósavatni næsta sumar gegn framvísun félagsskírteinis en skírteinin verða tilbúin á næstu dögum. Í samkomulaginu segir meðal annars: "1) Félögum í Stangaveiðifélagi Akureyrar er heimilt að stunda stangaveiði í Ljósavatni sumarið 2004 gegn framvísun félagsskírteinis. Þeim ber ávallt að hafa það meðferðis þegar veitt er í vatninu og framvísa því ef veiðiréttarhafar óska þess. 2) Stangaveiðifélag Akureyrar kemur upp póstkassa með veiðibók við vatnið og ber félögum sem stunda veiðar að skrá þar viðveru sína við vatnið og allan sinn afla. 3) Félagar í Stangaveiðifélagi Akureyrar skuldbinda sig til að ganga vel og snyrtilega um náttúruna í Ljósavatnsskarði og skilja ekkert eftir sig nema fótspor sín". Meðfylgjandi mynd var tekin við Ljósavatn í gærdag í heldur hryssingslegu veðri.


15 apr. 2004
Í kvöld klukkan 20.00 mæta Sigmundur Ófeigsson og Pétur Brynjólfsson í félagsheimili SVAK í Gróðrastöðinni og leiða áheyrendur í allan sannleikann um veiðina í Fnjóská. Þessir kappar þekkja hvern krók og kima í ánni eftir að hafa veitt þar um langt árabil með góðum árangri. Þeir ætla að þræða ána í máli og myndum, segja frá tökustöðunum, flugunum og leyndardómunum. Við skorum á áhugasama að mæta stundvíslega kl. 20 í kvöld og drekka í sig viskuna. Aðgangur er að sjálfsögðu ókeypis og allir velkomnir, félagsmenn sem aðrir, meðan húsrúm leyfir.

31 mar. 2004

Netkönnun meðal félagsmanna á sókn þeirra í Ljósavatn síðasta sumar virðist benda til þess að sumarleyfin þar hafi verið bærilega nýtt en varla neitt miklu meira en það. Rúmlega 50 manns svöruðu tölvupósti frá stjórn félagsins og eru niðurstöðurnar í grófum dráttum þessar: Sextán sögðust hafa farið til veiða í Ljósavatni síðasta sumar, samtals 57 sinnum. Nokkrir félagsmanna létu þess getið að þeir hefðu haft með sér fjölskylduna eða börnin. Vissulega eru þetta ekki háar tölur en þeir sem hafa stundað vatnið láta vel af veiðinni þar, sérstaklega snemmsumars, og ennfremur gæti stjórn SVAK gert átak í því að kynna vatnið betur fyrir félagsmönnum og hvetja þá til að nýta sér veiðina þar. Tekin verður ákvörðun um framhaldið á stjórnarfundi núna í vikunni. Allar athugasemdir eru vel þegnar og er þá best að senda póst á svak@svak.is.

Meðfylgjandi mynd var tekin á dögunum þegar doktor Jónas Jónasson heiðraði okkur með nærveru sinni, sagði sögur og sýndi réttu handtökin við hnýtingaborðið.


18 mar. 2004
1. aðalfundur Stangaveiðifélags Akureyrar var haldinn laugardaginn 13. mars. Um 20 manns sátu fundinn sem þykir þokkaleg mæting í ekki stærra félagi og er e.t.v. lýsandi fyrir þann einhug sem ríkir manna á meðal. Ný lög félagsins voru samþykkt, sömuleiðis einkennismerki þess, sem Guðmundur Ármann hannaði, og loks var öll stjórn félagsins endurkjörin einróma. Í skýrslu stjórnar sagði formaðurinn Ragnar Hólm Ragnarsson meðal annars: "Hver var tilgangurinn með því að stofna nýtt félag í þeirri flóru sem hér var fyrir? Jú, þær raddir gerðust æ háværari á Akureyri að í bæinn vantaði eitt stórt félag sem væri opið öllum stangaveiðimönnum og legði meðal annars áherslu á að efla félagsstarfið og þjappa mönnum saman með fræðslukvöldum og almennu félagsstarfi af ýmsum toga. Einnig væri rík ástæða fyrir norðlenska veiðimenn að sameina krafta sína því aðeins þannig gætu þeir unnið einhverja sigra á veiðileyfamarkaðinum þar sem samkeppnin um veiðisvæðin fer nú ört vaxandi og ásókn útlendinga eykst. ... Mjór er mikils vísir og að mati stjórnar var 10 mánaða starf okkar á árinu 2003 með ágætum. Félagið er komið vel á legg og við erum stórhuga. Sjálfboðaliðastarf og fórnfýsi er algjör forsenda þess að við náum að blómstra og viljum við hvetja félagsmenn alla til að leggja félaginu sínu lið og gera veg þess sem mestan."

17 mar. 2004

Við minnum félagsmenn alla á fræðslukvöldið með doktor Jónasi Jónassyni annað kvöld í Gróðrastöðinni. Búast má við líflegri og skemmtilegri dagskrá, eins og bréf Jónasar til SVAK-félaga ber með sér:

Ágætu Akureyringar!

Það verður sönn ánægja að heimsækja ykkur í nýja félagsheimilið ykkar í Gróðrastöðinni. Ég mun byrja á því að sýna veiðimyndir frá ferð til Argentínu nú í janúar síðastliðnum. Síðan mun ég fara í gegn um nýja vefinn minn og kynna nokkrar flugur sem ganga vel í Argentínu og alveg örugglega í sjóbirting hér á Fróni. Einnig sýni ég nýju Koparkeilurnar og hef með orginal Black Eyed Prawn (upprunalegi Francesinn).

Svo mun ég hafa með hnýtigræjurnar og hnýta meðal annars teygjuflugur og örflugur no 18. Kannski hnýti ég einnig rauðan Frances örflugu no 16. Að lokum verð ég með til sýnis nýtt taumefni sem ég mun hafa til sölu í sumar. Ævintýralega grannt miðið við styrkleika.

Hlakka til að sjá ykkur!
Dr Jónas

Dagskráin hefst kl. 20.00 annað kvöld, fimmtudagskvöldið 18. mars.

 


07 mar. 2004

Aðalfundur Stangaveiðifélags Akureyrar verður haldinn laugardaginn 13. mars kl. 14 í Gróðrastöðinni, Krókeyri, 600 Akureyri.

Dagskráin er svohljóðandi:

1. Fundarsetning, skipun fundarstjóra og fundarritara.
2. Fundargerð stofnfundar.
3. Skýrsla stjórnar. Umræður.
4. Reikningar félagsins. Umræður og afgreiðsla.
5. Lög félagsins borin upp til samþykkis.
6. Merki félagsins borið upp til samþykkis.
7. Stjórnarkjör og kjör skoðunarmanna.
8. Ákvörðun um árgjald og inntökugjald.
9. Lagabreytingar.
10. Önnur mál.

Núverandi stjórnarmenn gefa allir kost á sér til áframhaldandi setu í eitt ár. Ekki hafa komið fram aðrar tillögur um stjórnarmenn. Tillaga stjórnar um skoðunarmenn: Kristján Þór Júlíusson og Sigmundur Ófeigsson. Aðrar tillögur um skoðunarmenn hafa ekki komið fram. Reikningar félagsins liggja frammi hjá gjaldkera vikuna fyrir aðalfund.

Fjölmennið stundvíslega!
Stjórnin


01 mar. 2004

Pálmi Gunnarsson sýndi nokkrum áhugasömum félagsmönnum í SVAK snilldartakta í fluguköstum í kvöld og veitti þeim innsýn í leyndardóma betri kasttækni.

Um 15 manns komust að þetta fyrsta kvöld og kenndi Pálmi án endurgjalds. Kennt var í íþróttahúsi Oddeyrarskóla en heldur þótti salurinn lítill og hafa menn ákveðið að færa sig yfir á Svalbarðsströnd með framhaldið annað kvöld, þriðjudagskvöld. Stjórn félagsins vonast til að finna hentugt og laust húsnæði fyrir kastkennslu til að geta boðið öllu áhugafólki um fluguköst tilsögn. Við sjáum hvað setur en menn létu vel af kennslunni hjá Pálma í kvöld og skemmtu sér hið besta.

 

Meðfylgjandi myndir voru teknar í Oddeyrarskóla í kvöld þar sem Pálmi sýndi mönnum venjuleg köst, veltiköst, hið svonefnda stóra-veltikast og snákaköst svo eitthvað sé nefnt. Aðalmálið er að sögn Pálma, mýktin og að beita engum kröftum við köstin.


26 feb. 2004

Við viljum minna félagsmenn á kynningarkvöldið í kvöld þar sem þeir mæta Stefán Sigurðsson frá Lax-Á og Jóhann S. Þorbjörnsson frá Útivist og Veiði í félagsheimilið og kynna splunkunýja söluskrá Lax-Á, Last Hope hnýtingarefnin, Loop stangir og línur.
Þeir félagar verða með myndasýningu frá veiðisvæðum Lax-Á og einnig mun Jóhann hnýta flugur úr hrosshárum frá Last Hope og kynna nýjar stangir og línur frá Loop.
Kynningin hefst klukkan 20, allir velkomnir.


25 feb. 2004

Pálmi Gunnarsson stýrir flugukastkennslu á vegum Stangaveiðifélags Akureyrar næstkomandi mánudags- og þriðjudagskvöld. Námskeiðið er ætlað veiðimönnum sem vilja bæta leikni sína í meðferð flugustangar og línu. Pálmi útskýrir þau lögmál sem eru að verki og sýnir hvernig nota á flugustöngina rétt. Námskeiðið er ætlað félögum í Stangaveiðifélagi Akureyrar en er ekki fyrir byrjendur í fluguköstum. Athugið að aðeins 15 manns komast að á þetta fyrsta kastnámskeið félagsins og hér gildir að fyrstir koma fyrstir fá. Þátttökugjald er ekkert og fer skráning fram daglega í síma 865 1772 milli kl. 16 og 17 fram á mánudag. Kastkennslan hjá Pálma og félögum fer fram í íþróttahúsi Oddeyrarskóla frá kl. 20-22 mánudagskvöldið 1. mars og þriðjudagskvöldið 2. mars.


17 feb. 2004

Dr. Gísli Már Gíslason, prófessor í vatnalíffræði við Líffræðistofnun Háskóla Íslands flytur fyrirlestur um umgengni við íslenskar ár.
Lífríki áa mótast af eðli vatnasviðanna, þ.e. af jarðfræði þeirra, landslagi og gróðurfari. Framleiðni vatnsfalla ákvarðast af lífrænni framleiðslu og lífrænu reki. Lífræn framleiðsa ræðst af veðrun berggrunns og jarðvegs á vatnasviðinu, viðstöðu vatns í stöðvötnum og ákomu lífræns grots, sem berst frá gróðri á vatnasviðinu.
Íslendingar hafa á 11 hundruð árum gjörbreytt gróðurfari á öllu Íslandi og hafa reyndar gert stóran hluta af hálendi landsins að eyðimörk. Einnig hafa  þeir verið iðnir við að þurrka upp votlendi á láglendi og þannig breytt  rennslishegðun vatna, sem og breytt efnasamsetningu í þeim. Virkjanaframkvæmdir og vegagerð hafa einnig breytt rennslishegðun vatnsfalla. Reynt verður að meta hvaða áhrif þetta hefur haft á dýralíf í ám á Íslandi.
Fyrirlesturinn verður fimmtudaginn 19. febrúar, kl. 16 í Hátíðarsal Hólaskóla. Allir velkomnir!! 
(Tekið af heimasíðu Hólaskóla. www.holar.is)


13 feb. 2004

Með hækkandi sól er að lifna yfir félagsmönnum SVAK og hefur aðsókn að félagsheimilinu í Gróðrastöðinni verið vaxandi síðustu vikur. Góð mæting var á kynningarkvöldið þar sem Pálmi Gunnarsson fjallaði um sjóbleikjuveiðar á Grænlandi og ráku margir upp stór augu þegar þeir sáu myndirnar af allt að 24 punda risableikjum í höndum veiðimanna! Víst er að marga klæjar í fingurna að komast í þessa veiðiparadís og nú er bara að sjá hvort einhverjir SVAK-félagar sláist í för með Pálma.

Síðasta þriðjudagskvöld var einnig býsna þétt setinn bekkurinn á hnýtingakvöldi og er gaman að sjá ný andlit við borðið í félagsheimilinu. Miðað við þessa aðsókn í janúar og febrúar má ljóst vera að það verður þröng á þingi þegar líður að vori og hugur verður kominn í menn.

Vakin er athygli á því að kynningakvöld sem auglýst var 19. febrúar frestast um viku eða til 26. febrúar en þá ætlar Stefán Sigurðsson að kynna veiði í ám og vötnum hérlendis og erlendis. Stefnt er að því að senda út fréttabréf í næstu viku með nánari upplýsingum.


29 jan. 2004

Í tilefni kynningarinnar í kvöld býðst félagsmönnum að kaupa veiðileyfi á 30% kynningarafslætti í Hrauni í Laxá í Aðaldal. Tilboðið nær til allra virkra daga í sumar og stendur aðeins fram yfir næstu helgi. Frá og með 2004 verður veiðitími á Hrauni frjáls þ.e. menn geta veitt lögbundna 12 tíma þegar þeim hentar. Þó þannig að á lokadegi verði ekki veitt lengur en til 3 að nóttu þannig að áin hvílist fyrir næstu veiðimenn. Eingöngu er veitt með flugu og öllum veiddum laxi sleppt.  Kvóti er á urriðanum eða 6 fiskar á dag. Öllum veiddum fiskum fram yfir það skal sleppa.

Nánari upplýsingar gefur:
Íslenska fluguveiðiþjónustan
Stórholti 16 603 Akureyri
4612456  8972170
tiffs@tiffs.is
www.tiffs.is


26 jan. 2004
Við minnum alla áhugasama á opið hús í félagsheimilinu okkar næsta fimmtudagskvöld kl.20.00. Þá ætlar hinn landskunni veiðimaður og söngvari Pálmi Gunnarsson að fjalla um veiðiskap á Grænlandi og koma eflaust belgmiklar sjóbleikjur þar mikið við sögu. Félagsmenn eru hvattir til að mæta stundvíslega og taka með sér gesti. Allir velkomnir meðan húsrúm leyfir!

12 jan. 2004
Um helgina hefur verið unnið ötullega í nýju félagsheimili SVAK klárt en þó vantar enn nokkuð upp á að allt sé tilbúið og auglýsir stjórn félagsins hér með eftir hillum og hirslum sem félagsmenn vildu gefa eða lána. Ennfremur vantar góðan hornsófa í herbergi sem ætlað er sem skrifstofa eða setustofa. Flestir eiga gamalt dót sem þeir þurfa að losa sig við og hver veit nema það gæti hentað í félagsheimilið? Hafið samband við stjórnina, sendið póst á svak@svak.is og mætið kl. 20 á þriðjudagskvöld til að skoða aðstæður. Fyrsta fréttabréf félagsins ætti að berast öllum félagsmönnum í dag, mánudag, með upplýsingum um dagskrá vetrarins og veiðileyfi sem á boðstólum eru fyrir næsta sumar.

08 jan. 2004

Nú er unnið að því að mála og fríkka upp á nýtt félagsheimili Stangaveiðifélags Akureyrar. Guðmundur Ármann, Rúnar Þór, Jón Bragi, Björgvin Harri og Ingvar Karl hafa lagt gjörva hönd á plóginn síðustu daga. María stjórnarmaður var farin þegar myndin var tekin.

 


07 jan. 2004
Stjórn félagsins er nú ásamt fræðslunefnd á fullu að undirbúa starfið á næstu mánuðum. Félagið gekk frá samningi um leigu á miðhæð Gróðrastöðvarinnar við Krókeyri á dögunum og hefur fengið lykla að húsnæðinu. Ákveðið var á stjórnarfundi í gær að frá og með næstu viku verði opið þar á þriðjudags- og fimmtudagskvöldum. Þriðjudagskvöldin verða hnýtingakvöld en fimmtudagskvöldin ætluð fyrir kynningar- og fræðslukvöld eða skrafs og ráðagerða þegar ekki er um sérstaka dagskrá að ræða. Vinnsla við dreifibréf til félagsmanna er hafin og er stefnt að því að koma því út til félagsmanna á næstu dögum. Þar verður að finna upplýsingar um vetrardagskrána og þau veiðileyfi sem í boði verða næsta sumar á vegum félagsins.

Veiðileyfi

Hörgá
23 jún. 2017
Svæði 1 fyrir hádegi
Verð: 4.200 kr. - Stangir: 2
23 jún. 2017
Svæði 2 fyrir hádegi
Verð: 4.200 kr. - Stangir: 2
23 jún. 2017
Svæði 3 fyrir hádegi
Verð: 4.200 kr. - Stangir: 2

Laxá - Hraun
01 júl. 2017
1 stöng á neðra svæði fyrir hádegi
Verð: 6.500 kr. - Stangir: 1
01 júl. 2017
1 stöng á neðra svæði eftir hádegi
Verð: 6.500 kr. - Stangir: 1
06 júl. 2017
1 stöng á efra svæði fyrir hádegi
Verð: 6.500 kr. - Stangir: 2

Ólafsfjarðará
19 júl. 2017
Efra svæði fyrir hádegi og neðra eftir hádegi
Verð: 10.800 kr. - Stangir: 1
21 júl. 2017
Efra svæði fyrir hádegi og neðra eftir hádegi
Verð: 10.800 kr. - Stangir: 1
30 ágú. 2017
Efra svæði fyrir hádegi og neðra eftir hádegi
Verð: 10.800 kr. - Stangir: 2

Svarfaðardalsá
23 jún. 2017
1 stöng í heilan dag
Verð: 5.000 kr. - Stangir: 2
23 jún. 2017
1 stöng í heilan dag
Verð: 5.000 kr. - Stangir: 2
23 jún. 2017
1 stöng í heilan dag
Verð: 5.000 kr. - Stangir: 2